Convenio coa SD Compostela
A Sociedade Deportiva Compostela e o Miladoiro Sociedade Deportiva asinaron o 19 de agosto de 2019 un acordo de colaboración nas categorías inferiores para as próximas dúas tempadas, 2019-20 e 2020-21, mediante o cal pretenden o impulso da actividade futbolística na comarca, ademais dun estímulo para os máis novos.
Coa firma de ambos os presidentes, Antonio Quinteiro Canedo e Vicente González López respectivamente, ambas as entidades comprométense a traballar conxuntamente, de forma activa, na formación dos xogadores, pero tamén dos técnicos. O convenio permitirá aos adestradores e futbolistas da base do Milladoiro SD participar nos programas impulsados polo Compos, como o de formación de técnicos, a Compostec, o Clínic ou os Campus, coas mesmas vantaxes que os membros do club branquiazul. A maiores, ambos colaborarán na cesión de xogadores para tentar axudarse mutuamente e, por último, os adestradores do Milladoiro poderán asistir gratuitamente aos encontros de liga no Estadio Verónica Boquete de San Lázaro.